Die Internasionale Handelsadministrasiekommissie van Suid-Afrika (“ITAC” of “die Kommissie”) het in sy ITAC-verslag No. 491, ‘n verhoging van die doeaneregte op loodsuurbatterye van 5% ad valorem tot 15% ad valorem aanbeveel. Die Kommissie het verder aanbeveel dat die tariefstruktuur op die betrokke loodsuurbatterye na drie jaar hersien moet word om, onder andere, die impak van tariefbeskerming op die bedryf te bepaal. Die betrokke produkte is indeelbaar by tariefsubposte 8507.10.91 en 8507.10.99.
Op 18 Maart 2022, het die Kommissie die inisiëring van die hersiening van die tariefstruktuur op die betrokke loodsuurbatterye gepubliseer in Staatskoerant No. 46059, Kennisgewing (No. 894 van 2022) vir belanghebbende partye om kommentaar te lewer.
Tydens sy beraadslagings het die Kommissie alle relevante inligting tot sy beskikking in oorweging geneem. Die Kommissie het, onder andere, die volgende faktore in ag geneem:
(i) Daar is tans vier bekende vervaardigers van die betrokke produkte gevestig in die Suider-Afrikaanse Doeane-Unie (“SADU”).
(ii) Sedert die implementering van tariefondersteuning in 2015 (2015 tot 2017), was daar 'n afname in die volume van laaggeprysde invoere van soortgelyke produkte. Gedurende hierdie tydperk het tariefondersteuning, die SADU-industrie instaat gestel om sy plaaslike markaandeel te vergroot gepaardgaande met ‘n styging in beleggingsvlakke, aanskaf van kapitaalmasjinerie en groei in indiensnemingsvlakke.
(iii) Die Kommissie het egter gedurende die hersieningsondersoek vir die tydperk 2019 tot 2021, bevind dat daar 'n toename was in die vlakke van invoere van soortgelyke laaggeprysde produkte. Die tendens het aanleiding gegee tot ‘n verlaging van plaaslike vervaardigers se markaandeel, produksievolumes, kapasiteitsbenutting en die skepping van werksgeleenthede.
By oorweging, het die Kommissie tot die gevolgtrekking gekom dat ‘n verhoging in die vlakke van doeaneregte betaalbaar op die betrokke produkte die SADU-industrie in staat sal stel om sy plaaslike markaandeel te vergroot en voordele van skaal te verkry. Dit behoort ook die mededingensposisie van die bedryf teen soortgelyke laaggeprysde invoere te verbeter. Daarbenewens sal tariefondersteuning lei tot die retensie van bestaande werksgeleenthede en die skepping van addisionele werksgeleenthede in die motorsektor.
Uit hoofde van die voorgaande het die Kommissie aanbeveel dat die doeanetarief op loodsuurbatterye van 'n soort wat gebruik word om suierenjins aan te skakel, indeelbaar by tariefsubposte 8507.10.91 en 8507.10.99, verhoog word van 15% ad valorem na die Wereldhandelsorganisasie se bindingsvlak van 30% ad valorem.
Klik asseblief op die skakel hieronder om toegang tot die volledige verslag te kry:
UITGEREIK DEUR DIE INTERNASIONALE HANDELSADMINISTRASIEKOMMISSIE VAN SUID-AFRIKA